ملحمة عتيبه

[ce]]هذه القصيده للشاعر كديميس صالح العصيمي في مدح عتيبه

يالله ياغافـر خطـايـا عبـيـده
ياحاجـزٍ مابيـن بحـره وقاعـه
ارجـوك باالدنيـا حيـاة ٍ سعيـده
وبالآخره رحمتـك يـوم المراعـه
إذا حصد راعي الحساب الحصيـده
وتفقد المحصول راعـي الزراعـه
اعمالنا من غيـر عفـوك زهيـده
انته رجاء الإنسان حين انصراعه
وان كان كلٍ قـام يفخـر بصيـده
يوم ان كل ٍ مـن حريبـه متاعـه
سر ياقلم سجـل مشـد النشيـده
نبي نجدد مامضى عـن ضياعـه
عليك تصريـح الخبـر وتحديـده
وانـا عليّـه صنعتـه واختراعـه
سجلـي ابيـاتٍ نظـافٍ وكـيـده
بكتاب عن نقد اللواعيـب راعـه
حاول يصيرالبيـت جملـه مفيـده
حتى يليق لمـن قـراه استماعـه
ابرسلـه لا بـان جـده وجـيـده
ليا منبع الحكمه وبحـر الشجاعـه
اسندت لأبن حميد صدر القصيـده
ويصدر عليها الحكم بعد اطلاعـه
سلطان ابن جهجاه شيـخ البديـده
حلال صعبـات الأمـور ابراعـه
شيخ ٍمحابيـل العـداء ماتصيـده
ولوهاجمه وقته بحـربٍ مااطاعـه
ولو شاف غاراته وسمـع تهديـده
ومخالط ٍ بعـض النوايـا لكاعـه
بثنا المحافـل والعيـون الحديـده
ماهوب في صعب المواقف رعاعه
وان جا نهارٍ فيه صايـد وصيـده
هوقايـد الهيـلا نهـار الصعاعـه
هو قايد اليـوم الكبيـر وعميـده
ليا صار بالميدان شريـه وباعـه
امارتـه ماهيـب بدعـه جديـده
بالجود والأمجـاد ياطـول باعـه
له راية ٍ بيضـاء عتيـق ٍ عتيـده
وعمودها فيه الرهـا بـا رتفاعـه
رايـه يسلمهـا الكبيـر لحفيـده
نعم الوديع ونعـم ذيـك الوداعـه
تركي سمع في وسط نجـدٍ بجيـده
ولا احدٍ يجيها الا يسوق الرتاعـه
من دونها قـومٍ عصـاة ٍ عنيـده
واميرهم ماهوب سهـل انصياعـه
وكتـب مكاتيبـه وطـرش بريـده
وساس الأمور بكل حلـم ووقاعـه
وحاول بشتى الطرق يقنع ضديـده
لكن عـن رايـه ياكـود اقتناعـه
وبعد انغلق باب المساعي الحميـده
شب الشعار وشاف راي الجماعـه
وقالولـه ارسلـك بيـان بجريـده
رد النقـا لاهـل النقـا بالاذاعـه
ان كان يبغى الحرب حنـا نريـده
وفينا ليا حمي الوطيس استطاعـه
لابد مانرفـع يـده عـن رصيـده
وش عاد لو حصن حماه بدفاعـه
وشن الهجوم وصار تركي عقيـده
وصمم على حرب الحريب ونزاعه
وتواجهـوا والله فعـل مايـريـده
واحد ٍ كسب واحدٍ خسر له بضاعه
تركي كسب دار ٍ عريض ٍ مديـده
وخصمه كتب للدار حامض وداعـه
وا فعال ابن هندي بنجـد ٍ مجيـده
ان صارللحرب الضروس اندلاعـه
محمد لايا حكـت حديـده حديـده
مافيه عن وجه الحريب انهزاعـه
شيخ ٍ يجندل في المعـارك قنيـده
فعله زرع بقلوب الاجنـاب راعـه
جدعة قبيله فـي اللقـى ماتكيـده
بالسيف من سرج الجواد انجظاعه
امـا قطـع يمنـاه ولا وريــده
ولا بحـد السيـف يبتـر خناعـه
وليا عمد جمع ٍ هـدم منـه حيـده
وليا انهزم خصمه يعـاف اتباعـه
علـط الأسنـه باللقـى ماتصيـده
تقـول معطيـه الكريـم المناعـه
يا ما ذبح يوم الرحى مـن فقيـده
وخمسين من خيل الطنايـا قلاعـه
محـذِ اليديـن الفارغـه مايفيـده
من القيوم يحذي مفلسين الجماعه
يريـد صعبـات الأمـور وتريـده
ليا صدعن صعب الأمور الزعاعـه
ولأبن بجاد بنجد سيـره رشيـده
رمزالمهابـه والتقـى والقنـاعـه
شيخ ٍ نشر بيـن العبـاد العقيـده
واعلن منار الدين واشرق شعاعه
ومن شذ عن درب الجماعه يعيـده
بالوعض والا بالسـلاح ارتداعـه
كم شيخ قوم ٍ حـط بيديـه قيـده
حتى استقام الشيخ بعـد امتناعـه
وقاد السرب لإ خضاع من لايفيـده
عن الوعظ والإرشاد فيه انقطاعـه
يالله عسى روحه بعفـوك شهيـده
حيثه عمل بكتـاب ربـه واطاعـه
ولهـم قبيلـه كـل فـن ٍ تجيـده
فالحـرب لاعـم البـلاد اتساعـه
بالسيف والرمح الردينـي طريـده
وهدف ٍ يشيلن الهدف بالسراعـه
وشلف ٍ على قب ٍ عراض ٍ حديده
قبل يجي عصر الفضا والصناعـه
عاشت بنجد سنين جـرد ٍ عديـده
وجيرانهـا ناوينهـا بالقطـاعـه
محفوفة ٍ من كل صـوب ٍ بمكيـده
وقوم ٍ لهم في كل يـوم ارتباعـه
من احزاب من كثر العدد مستفيـده
هـذا يهاجمهـا والآخـر ارداعـه
مر ٍجمع عبده ومـرٍ عبيدهمـرٍ ه
ل العـارض تمـيـم وخـزاعـه
ومرٍجمع علـوى وعلـوى نكيـده
وبريه هـم واخواننـا بالرضاعـه
لكـن ردت كـل جمـع ٍ بكـيـده
وكل ٍ تبرى من حليفـه واضاعـه
قامت ترد الصاع صـاع وتزيـده
كل ٍ تكيـل الـه المنايـا بصاعـه
واقفوا لهم مع كـل فـج ٍ سريـده
السالم اللي راح يسحـب كراعـه
وارست قواعدهـا بنجـدٍ وطيـده
وتخيـرت مثنـاة نجـد ورفاعـه
برقا وروق الهم مواقـف فريـده
وفيهم على جمع الحريب اندفاعـه
مثل العضيد اللي يسانـد عضيـده
والجمع دايـم عزتـه باجتماعـه
يلجاء لهم من كـان حملـه يكيـده
من الخوف والا في ليالي المجاعه
برقا هل الـروز الثقيـل الوحيـده
ليا بنى حـرب القبايـل شراعـه
اليا واجه الموعـود راع الوعيـده
وتعانقت حدب السيـوف بشناعـه
يا ما نحوا بسيوفهـم مـن بديـده
عن نجد يوم انه تقانـب اسباعـه
دقلاتهـم جمـع المعـادي تبيـده
ليا حاربوا جمـع ٍ يتـم انقشاعـه
مثل الخيال اللـي مزونـه سديـده
سيله يطـم المنخفـض والرفاعـه
واولاد روق اللي خطاهـم بعيـده
اللـي لهـم كزالمجـوخ ولاعــه
قطاعة الفرجه ليـا جـت شديـده
يوم ان كل ٍ نجدتـه مـن ذراعـه
من اللي خذا طرش الحفيف وعبيده
وهفه وتفه مـن شفـاتٍ لقاعـه
وليا بدا زحـف الحديـد لحديـده
عا داتهم كسب النصر وانتزاعـه
وقعـة طـلال ام العلـوم الأكيـده
بالكتب سجلهـا جهـاز الطباعـه
يوم ان ابن فيصل نواهـم بكيـده
وسحب مطير ومن يحب الطماعـه
وبعد انتهى دور السبـر والقعيـده
وقالوا هل الرايـات للخيـل فاعـه
لبسوا دروع ٍ محكمـات ٍ جويـده
وسلوا سيوف ٍ مطعمه سم ساعـه
وردوا شديد البـاس عمـا يريـده
واقفا يحث مـع الخريمـه رباعـه
وليا ولوا خلوا للأعـداء شريـده
ويشهد على ميدان معتق ضلاعـه
شيمة عرب حتى المحارب تفيـده
ليا ذل تترك له طريـق انجلاعـه
هذا بيان ومصـدره مـن جريـده
جريدة الأخبـار ساعـه بساعـه
بأقـلام لا عجلـه ولاهـي بليـده
مأمونة الاطراف عـن كـل تاعـه
لا تنقص الواقـع ولاهـي تزيـده
كل ٍعلاماتـه علـى مااستطاعـه
عديت بعض اللي نويـت تعديـده
وكشفت عن وجه المجلـد قناعـه
وانهيت بالصفحه مطاف النشيـده
وصلوا على صاحب مقام الشفاعه



وشكراً...

nter[color:13fb=darkblue